“Ang kumakain ng Aking katawan at umiinom ng Aking dugo ay nananatili sa Akin, at Ako naman sa kanya” – Juan 6:56, (ASND)

NOONG panahong iyon, sinabi ni Hesus sa mga tao: “Ako ang pagkaing nagbibigay-buhay na bumaba mula sa langit. Mabubuhay magpakailanman ang sinumang kumain nito. At ang pagkaing ibibigay ko sa ikabubuhay ng sanlibutan ay ang aking laman.”

Dahil dito’y nagtalu-talo ang mga Judio. “Paanong maibibigay sa atin ng taong ito ang kanyang laman upang kanin natin?” tanong nila. Kaya’t sinabi ni Hesus, “Tandaan ninyo: malibang kanin ninyo ang laman ng Anak ng Tao at inumin ang kanyang dugo, hindi kayo magkakaroon ng buhay.

Ang kumakain ng aking laman at umiinom ng aking dugo ay may buhay na walang hanggan, at muli ko siyang bubuhayin sa huling araw. Sapagkat ang aking laman ay tunay na pagkain, at ang aking dugo ay tunay na inumin. Ang kumakain ng aking laman at umiinom ng aking dugo ay nananahan sa akin, at ako sa kanya. Buhay ang Amang nagsugo sa akin, at ako’y nabubuhay dahil sa kanya. Gayundin naman, ang sinumang kumain sa akin ay mabubuhay dahil sa akin. Ito ang pagkaing bumaba mula sa langit; ang kumakain nito’y mabubuhay magpakailanman. Hindi ito katulad ng kinain ng inyong mga magulang sa ilang; namatay sila bagamat kumain niyon”.

Aral Gabay sa Buhay:

Ang pananatili kay Kristo ay hindi lamang paniniwala kundi pagsasabuhay ng Kanyang pag-ibig, pagpapatawad, kababaang-loob, at katapatan. Kapag tayo ay nagsasabuhay at nanatili tayo sa Kanya unti-unti Niyang binabago ang ating pag-iisip, salita, at mga gawa. Ang bunga nito ay kapayapaan, pag-asa, at lakas na harapin ang mga hamon ng buhay.